សូមស្វាគមន៍ www.k-breakingtvonline.com.kh / មានទទួលសេរវា ផ្សាយពាណិជ្ជកម្ម គ្រប់ប្រភេទ / ចាងហ្វាងការផ្សាយ: លោក ប៊ុត ពុទ្ធី ទីស្នាក់ការស្ថិតផ្ទះគ្មានលេខ ផ្លូវលំ ភូមិតាងៅ សង្កាត់និរោធ ខណ្ឌច្បារអំពៅ ភ្នំពេញ / ទំនាក់ទំនង ទូរសព្ទ៖ 0883070002
សូមស្វាគមន៍ គេហទំព័រ ប្រឹកឃីងធីវីអនឡាញ / មានទទួលសេរវា ផ្សាយពាណិជ្ជកម្ម គ្រប់ប្រភេទ / ចាងហ្វាងការផ្សាយ៖ លោក ប៊ុត ពុទ្ធី មានទីស្នាក់ការកណ្តាល / ផ្ទះគ្មានលេខ ផ្លូវលំ ភូមិតាងៅ សង្កាត់និរោធ ខណ្ឌច្បារអំពៅ ភ្នំពេញ។ ទំនាក់ទំនង : 0883070002

Monday, 11 May 2026

ឯកឧត្តមបណ្ឌិត សោម ពិសិដ្ឋ រំពឹងផលិតផលត្រីខ និងទឹកត្រី របស់ខេត្តកែបអាចជំនួសផលិតផលនាំចូល ខណៈរោងចក្រសម្រេចការសាងសង់បានជាង៦០%

ចំនួនអ្នកទស្សនា: Views


ខេត្ត​កែប៖ រាប់ជាគម្រោងវិនិយោគដំបូងមួយនៅកម្ពុជា ដែលផ្តោតលើការផលិតត្រីខកំប៉ុង និងទឹកត្រីក្នុងទ្រង់ទ្រាយឧស្សាហកម្ម ខណៈរោងចក្ររបស់ក្រុមហ៊ុន សាន់ សៃ ឯ.ក កំពុងដំណើរការសាងសង់នៅលើទឹកដីខេត្តកែប និងសម្រេចបានជាង៦០ភាគរយហើយ។ ក្រោយដំណើរការ រោងចក្រនេះនឹងមានតម្រូវការត្រីទឹកប្រៃ និងត្រីទឹកសាបរាប់តោនក្នុងមួយថ្ងៃ ដើម្បីផលិតត្រីខកំប៉ុង និងទឹកត្រី ផ្គត់ផ្គង់ទីផ្សារក្នុងស្រុក។


ឯកឧត្តមបណ្ឌិត សោម ពិសិដ្ឋ អភិបាលខេត្តកែប បានសម្តែងការគាំទ្រយ៉ាងពេញទំហឹង និងលើកទឹកចិត្តឱ្យក្រុមហ៊ុនពន្លឿនការសាងសង់ និងពង្រីកសមត្ថភាពផលិត ដើម្បីជំរុញផលិតផលក្នុងស្រុកឱ្យកាន់តែមានសក្តានុពលប្រកួតប្រជែងលើទីផ្សារ។

ថ្លែងក្នុងពិធីអបអរសាទរខួបអនុស្សារីយ៍លើកទី១៤០ នៃទិវាពលកម្មអន្តរជាតិ ១ឧសភា ឆ្នាំ២០២៦ នាថ្ងៃទី១១ ខែឧសភានេះ ឯកឧត្តមបណ្ឌិតអភិបាលខេត្តកែប មានប្រសាសន៍ថា ស្របពេលកម្លាំងពហិកាភ្លូកទឹកភ្លូកដីរបស់ប្រជាពលរដ្ឋខ្មែរ ទាំងក្នុងនិងក្រៅប្រទេស លែងប្រើប្រាស់ផលិតផលប្រទេសថៃ ផលិតផលក្នុងស្រុកដែលផលិតដោយកូនខ្មែរ ប្រើវត្ថុធាតុដើមខ្មែរ កំពុងជំនួសផលិតផលទាំងនោះ ជាមួយគ្នានេះខេត្តកែបក៏នឹងមានម៉ាកយីហោត្រី ខ និងទឹកត្រី ដាក់លក់លើទីផ្សារឆាប់ៗខាងមុននេះផងដែរ។

លោក ហ៊ឹម ពិសិដ្ឋ អ្នកគ្រប់គ្រងទូទៅក្រុមហ៊ុន សៃសាន់ អុីនវេសម៉ិន ឯ.ក បានអោយដឹងថា នេះជាការសម្រេចចិត្តដោយមិនស្ទាក់ស្ទើ របស់លោកអគ្គនាយកក្រុមហ៊ុន ក្នុងការបោះទុនវិនិយោគផលិតត្រីខ និងទឹកត្រីនេះឡើង ក្នុងន័យខ្មែរផលិត ដើម្បីខ្មែរ និងដើម្បីជីវភាពពលរដ្ឋខ្មែរ។ លោកថា ស្របពេលប្រជាពលរដ្ឋយើងពហិកាមិនប្រើផលិតផលប្រទេសថៃ តើយើងមានអ្វីសម្រាប់ជំនួស នេះជាហេតុផលដែលក្រុមហ៊ុនសម្រេចបង្កើតរោចក្រផលិតត្រី ខ និងទឹកត្រីនេះឡើង។

គួរបញ្ជាក់ថា ក្រុមប្រឹក្សាអភិវឌ្ឍន៍កម្ពុជា (CDC) កាលពីខែមករា ឆ្នាំ២០២៦ កន្លងទៅនេះ បានអនុម័តគម្រោងបង្កើតរោងចក្រត្រីខកំប៉ុង និងទឹកត្រី ក្រោមទំហំទុនវិនិយោគ ៧ លានដុល្លារ ស្ថិតនៅក្នុងស្រុកដំណាក់ចង្អើរ ខេត្តកែប។ តាមការបញ្ជាក់ពីអ្នកគ្រប់គ្រងទូទៅ ក្រៅតែពីផ្តល់ឱកាសការងារជាង២០០កន្លែងដល់ពលរដ្ឋ ក្រុមហ៊ុនក៏មានតម្រូវការខ្ពស់ដែរក្នុងការប្រមូលទិញត្រីពីប្រជានេសាទទាំងត្រីទឹកសាប និងត្រីទឹកប្រៃ ដូចជាត្រីកាម៉ុង ត្រីគួន ត្រីកាកឺមជាដើម៕







Saturday, 2 May 2026

ឧត្តមសេនីយ៍ឯក រ័ត្ន ស្រ៊ាង លើកឡើងថាភាពស្ទាត់ជំនាញ នៃកម្លាំងប្រតិបត្តិការអាវុធហត្ថរាជធានីភ្នំពេញ ដោយសារមានគ្រូបង្គោលហ្វឹកហ្វឺនជាប់ជាប្រចាំ ប្រៀបដូចកាំបិតរណាត្រូវការសំលៀងទើបមុត!

ចំនួនអ្នកទស្សនា: Views

 


នៅរសៀល ថ្ងៃទី១ ខែឧសភា ឆ្នាំ២០២៦ នៅបញ្ជាការដ្ឋានកងរាជអាវុធហត្ថរាជធានីភ្នំពេញ លោកឧត្តមសេនីយ៍ឯក រ័ត្ន ស្រ៊ាង មេបញ្ជាការរង កងរាជអាវុធហត្ថលើផ្ទៃប្រទេស មេបញ្ជាការ កងរាជអាវុធហត្ថរាជធានីភ្នំពេញ បានអញ្ជើញដឹកនាំកិច្ចប្រជុំត្រួតពិនិត្យផែនការហ្វឹកហ្វឺន ប្រចាំឆមាសទី១ និង លើកទិសដៅឆមាសទី២ ឆ្នាំ២០២៦ ដោយមានការចូលរួមពី ក្រុមគ្រូបង្គោលប្រចាំកងរាជអាវុធហត្ថរាជធានីភ្នំពេញ ទាំងអស់ផងដែរ។


ថ្លែងក្នុងកិច្ចប្រជុំនាឱកាសនេះ លោកឧត្តមសេនីយ៍ឯក រ័ត្ន ស៊្រាង បានលើកសរសើរដល់ ក្រុមគ្រូឧទ្ទេសនាមទាំងអស់ ដែលជាគ្រូបង្គោលផ្ទាល់ របស់ កងរាជអាវុធហត្ថរាជធានីភ្នំពេញ ដែលបានយកចិត្តទុកដាក់ ហ្វឹកហ្វឺនជាប់ជាប្រចាំ ដល់កម្លាំងអាវុធហត្ថ ទូទាំងរាជធានីភ្នំពេញ តាមរូបមន្តឆ្លាស់វេនគ្នា មកទទួលការហ្វឹកហ្វឺន ជាលក្ខណៈវិលជុំ លើមុខវិជ្ជាសំខាន់ៗដូចជា៖ មេរៀន វិន័យនិងសណ្តាប់ធ្នាប់ របស់កងរាជអាវុធហត្ថ, មេរៀន ទទួលពាក្យបណ្តឹង តាមប្រព័ន្ធទូរស័ព្ទ១២៩១, មេរៀន និតិវិធីប្រតិបត្តិការ មណ្ឌលព័ត៌មានរហ័ស១២៩១, មេរៀន សង្គ្រោះបឋម, មេរៀនប្រតិបត្តិការការពារថ្នាក់ដឹកនាំ, មេរៀនវាយលុកចូលអាគារបង្ក្រាបជនល្មើស, មេរៀនចាប់វាយខ្នោះជនល្មើសបណ្ដើរចូលរថយន្ត, មេរៀន បង់សំណាញ់ចាប់ជនល្មើស និងប្រើឧបករណ៍សុវត្ថិភាព, មេរៀន ក្បាច់គុន, មេរៀន កីឡា, មេរៀនប្រើប្រាស់អាវុធវែងខ្លី, មេរៀនព័ត៌មានវិទ្យា កុំព្យូទ័រ, មេរៀន ប្រើប្រាស់វិទ្យុទាក់ទងនិងបំភ័ន្តអក្ខរៈ, មេរៀនជីកលេណដ្ឋាន, មេរៀនឋានលេខា, មេរៀនទ័ពព្រៃ ។ល។

លោកឧត្តមសេនីយ៍ឯក រ័ត្ន ស្រ៊ាង បញ្ជាក់ថា ដោយសារបានការហ្វឹកហ្វឺនជាប្រចាំទាំងនេះហើយ ទើបធ្វើឲ្យកម្លាំងអាវុធហត្ថរាជធានីភ្នំពេញ មានភាពស្ទាត់ជំនាញ ក្នុងការបង្ក្រាបប្រឆាំងជាមួយនឹងក្រុមជនសង្ស័យ ដែលបង្កបាតុភាព បទល្មើសគ្រប់ទម្រង់ កាន់តែមានប្រសិទ្ធភាពខ្ពស់ តែលោកក៏ផ្តាំផ្ញើដល់គ្រូបង្គោលរបស់អាវុធហត្ថ រាជធានីភ្នំពេញទាំងអស់ ត្រូវដកពិសោធន៍មេរៀនបង្កើនសមត្ថភាពបំពេញបន្ថែមនូវមេរៀនផ្សេងៗ តាមការវិវត្តន៍របស់សម័យកាលផងដែរ៕








Friday, 1 May 2026

ឯកឧត្តមអភិសន្តិបណ្ឌិត ស សុខា និងលោកជំទាវ កោតសរសើរសមាគមនារី ដែលយកចិត្តទុកដាក់លើស្រ្តី ជាមន្ត្រីចូលនិវត្តន៍

ចំនួនអ្នកទស្សនា: Views

 


ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងលោកជំទាវ កែ សួនសុភី ស សុខា បានកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់គណៈកម្មការសាខាសមាគមនារីកម្ពុជា ដើម្បីសន្តិភាពនិងអភិវឌ្ឍន៍ ក្រសួងមហាផ្ទៃ ដែលបានផ្តួចផ្តើមរៀបចំឱ្យមានព្រឹត្តិការណ៍ដ៏មានសារៈសំខាន់ ផ្សារភ្ជាប់មនោសញ្ចេតនាស្រឡាញ់រាប់អាន និងនឹករលឹក សួរសុខទុក្ខដល់ស្រ្តីជាមន្រ្តីចូលនិវត្តន៍ បើទោះបីជាលោកជំទាវ លោកស្រីទាំងអស់ បានចូលនិវត្តន៍ហើយក្តី។


ការថ្លែងបែបនេះ ធ្វើឡើងក្នុងឱកាសដែលឯកឧត្តមអភិសន្តិបណ្ឌិត និងលោកជំទាវ អញ្ជើញជាអធិបតីពិធីសំណេះសំណាលជាមួយនិវត្តជនជាស្ដ្រី របស់ក្រសួងមហាផ្ទៃ នៅទីស្តីការក្រសួងមហាផ្ទៃ នារសៀលថ្ងៃទី៣០ ខែមេសា ឆ្នាំ២០២៦។ ពិធីនេះមានការអញ្ជើញចូលរួមពីលោកជំទាវប្រធានប្រតិបត្តិ អនុប្រធាន និងសមាជិក សមាជិការគណៈកម្មការសមាគមនារីកម្ពុជា ដើម្បីសន្តិភាព និងអភិវឌ្ឍន៍ក្រសួងមហាផ្ទៃ ជាច្រើនរូបផងដែរ។

ឯកឧត្តមអភិសន្តិបណ្ឌិត បានបញ្ជាក់ថា ពិធីសំណេះសំណាលនេះមានសារៈសំខាន់សម្រាប់ក្រសួងមហាផ្ទៃ ក៏ដូចជាគណៈកម្មការសាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ក្រសួងមហាផ្ទៃ ដោយបង្ហាញពីការយកចិត្តទុកដាក់ចំពោះនិវត្តជនដែលជាស្ត្រី។ បើទោះបីជាលោកជំទាវ លោកស្រី ចូលនិវត្តន៍ក៏ដោយ ក្រសួង នៅតែផ្តល់តម្លៃ ព្រោះនិវត្តជនជាស្ដ្រីទាំងអស់ ជាឃ្លាំងចំណេះដឹង និងបទពិសោធ ជួយត្រួសត្រាយផ្លូវសម្រាប់មន្ត្រីជំនាន់ក្រោយ។

លោកជំទាវ ជូ ប៊ុនអេង ប្រធានប្រតិបត្តិគណៈកម្មការសាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ ក្រសួងមហាផ្ទៃ បានមានប្រសាសន៍ថា សមាគមនារីកម្ពុជាដើម្បីសន្តិភាព និងអភិវឌ្ឍន៍ ត្រូវបានបង្កើតនៅថ្ងៃទី២ ខែធ្នូ ឆ្នាំ១៩៧៨ ហើយបានប្ដូរឈ្មោះ៤ដងតាមការវិវត្តសង្គម តាំងពីសមាគមនារីសង្គ្រោះជាតិ សមាគមនារីបដិវត្តន៍កម្ពុជា សមាគមនារីកម្ពុជា និងពីឆ្នាំ១៩៩៩ មកដល់បច្ចុប្បន្ន ជាសមាគមនារីកម្ពុជាដើម្បីសន្តិភាព និងអភិវឌ្ឍន៍។ សមាគមមានសាខាទូទាំងក្រសួង ស្ថាប័ន និងរាជធានី ខេត្ត ក្រុង ស្រុក ខណ្ឌ ព្រមទាំងបណ្តាញដល់មូលដ្ឋាន និងវិស័យឯកជន។

លោកជំទាវប្រធានប្រតិបត្តិ បន្ថែមទៀតថា សមាគមនារី គឺជាកម្លាំងស្ម័គ្រចិត្ត ដើម្បីចូលរួមគាំទ្រគោលនយោបាយជាតិ ក្រោមការដឹកនាំរបស់គណបក្សប្រជាជនកម្ពុជា និងបានប្រកាសជាផ្លូវការ នៅថ្ងៃទី២ ខែធ្នូ ឆ្នាំ១៩៧៨ ដើម្បីរួមគ្នាជាមួយអង្គការយុវជន សហជីព និងរណៈសិរ្សរួបរួមជាតិ រំដោះប្រទេសជាតិមាតុភូមិ និងប្រជាជនពីរបបប្រល័យពូជសាសន៍។

លោកជំទាវ បានបញ្ជាក់ថា ចរិតលក្ខណៈរបស់សមាគមនារី គឺផ្តោតលើសាមគ្គីភាព ឯកភាពផ្ទៃក្នុង មិនក្រអឺតក្រទម មិនរើសអើង ទន់ភ្លន់តែម៉ឺងម៉ាត់ ឈរលើអំពើល្អ ចេះជួយទុក្ខធុរៈគ្នា គាំទ្រគ្នា មិនអត្មានិយម មិនឆ្កិះឆ្កៀល ញុះញង់ បំបែកបំបាក់សាមគ្គីភាព ដែលទាំងអស់នេះ ជាមូលដ្ឋានគ្រឹះ ធ្វើឱ្យសមាគមនារី នៅតែមានភាពរឹងមាំ និងស្វាហាប់ ឆ្ពោះទៅមុខ និងរីកចម្រើនឥតឈប់ឈរ។

គួរបញ្ជាក់ថា គណៈកម្មការសាខាសមាគមនារីក្រសួងមហាផ្ទៃ បានរៀបចំរចនាសម្ព័ន្ធដែលមានសមាសភាពជាអាទិ៍ ថ្នាក់កិត្តិយស មានសមាសភាព ចំនួន ១៥រូប ថ្នាក់ប្រតិបត្តិមាន ៥៥រូប លេខាធិការដ្ឋានជាសេនាធិការមាន ៤៦រូប អនុសាខាសមាគមនារី នៅតាមបណ្តាអង្គភាពចំណុះក្រសួងមហាផ្ទៃ និងថ្នាក់ស្មើ ចំនួន ៦ ដែលមានថ្នាក់កិត្តិយស មាន ៤១រូប ជាប្រធាន និងឧត្តមភរិយាថ្នាក់ដឹកនាំអង្គភាព ថ្នាក់ប្រតិបត្តិ មាន ១១៦រូប និងសមាជិកដែលចុះបញ្ជីមាន ៥០០រូប៕














Saturday, 11 April 2026

ឯកឧត្តមអភិសន្តិបណ្ឌិត ស សុខា ៖ អនាគតរបស់ប្អូនៗ លើសពីនៅតាមដងផ្លូវ ចូរជ្រើសយកអំណាច កុំយកពន្ធនាគារ

ចំនួនអ្នកទស្សនា: Views


ភ្នំពេញ ៖ តាមរយៈផ្លូវការ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នារសៀលថ្ងៃទី១០ ខែមេសា ឆ្នាំ២០២៦ បានបង្ហោះសារមួយផ្ញើដល់យុវជន យុវនារី ក្រោមចំណងជើងថា “អនាគតរបស់ប្អូនៗ លើសពីនៅតាមដងផ្លូវ ចូរជ្រើសយកអំណាច កុំយកពន្ធនាគារ”។


ជាកិច្ចផ្តើមសំណេរ ឯកឧត្តមអភិសន្តិបណ្ឌិត បានលើកឡើងថា ខ្ញុំផ្ញើសារនេះទៅកាន់ប្អូនៗទាំងអស់គ្នា ដែលជាយុវជន ដ៏មានតម្លៃ និងយុវតី ដ៏មានកិត្តិយស ដែលកំពុងឈរនៅត្រង់ចំណុចរបត់ដ៏សំខាន់នៃជីវិត។ ប្អូនៗជាមនុស្សឆ្លាតវៃ! ប្អូនៗជាមនុស្សរឹងមាំ! ប្អូនៗមានសុបិនដែលកំពុងពុះកញ្ជ្រោលនៅក្នុងចិត្ត ប៉ុន្តែឥឡូវនេះ ប្រហែលជាមានគេ កំពុងនិយាយអូសទាញក្នុងត្រចៀកប្អូនៗថា៖ “ចូលមកជាមួយពួកយើង! ពួកយើងការពារអ្នក! ពួកយើង ជាគ្រួសារតែមួយ! យើងនឹងធ្វើឱ្យអ្នកក្លាយជាមនុស្សមានតម្លៃម្នាក់។”

ឯកឧត្តមអភិសន្តិបណ្ឌិត ស សុខា ក្នុងសំណេរបន្តផ្តើមដោយសំណួរ និងបរិយាយយ៉ាងដូច្នេះថា តើជាពាក្យសម្តីទាំងអស់នោះមែនទេ? វាជាការបោកប្រាស់ ដែលសម្ងំលាក់ខ្លួនក្រោមភាពស្មោះត្រង់ក្លែងក្លាយ។ ក្រុមក្មេងទំនើងទាំងនោះ មិនអាចផ្តល់អំណាចអ្វីឱ្យប្អូនៗបានទេ តែពួកគេ មានតែដកអំណាចចេញពីខ្លួនប្អូនៗទៅវិញទេ។ ពួកគេ សន្យាចំពោះរឿងមានបានអ្វីមួយ ប៉ុន្តែអ្វីដែលពួកគេ ផ្តល់គឺជាខ្សែចងទេ។ ពួកគេ បោកប្រាស់អ្នកដោយបង្ហាញថា បានប្រាក់ បានកិត្តិយស និងបានការគាំពារ ប៉ុន្តែការពិតអ្វីដែលពួកគេ ផ្តល់ដល់ប្អូនៗទាំងអស់គ្នានោះ គឺផ្លូវជាផ្លូវទ័លមួយពោរពេញទៅដោយអំពើហិង្សា ការញៀនថ្នាំ ការជាប់ក្នុងសៀវភៅកំណត់ហេតុរបស់នគរបាល និងការសោកស្តាយតែប៉ុណ្ណោះ។

ឯកឧត្តមអភិសន្តិបណ្ឌិត ស សុខា បានសង្កត់ធ្ងន់ថា ចូរប្អូនៗ សាកគិតវាមើលសិន! ការសិក្សាបង្ហាញថា ពេលប្អូនៗ សម្រេចជ្រើសយកវិថីជីវិតបែបនោះ ប្អូនៗនឹងបាត់បង់ឱកាសក្នុងការសិក្សា។ ប្អូនៗក៏ត្រូវប្រឈមនឹងការចាប់ខ្លួន រងរបួស ឬអាចមានរឿងរ៉ាវផ្សេងៗទៀត ដែលអាក្រក់ជាងនេះ។ ទោះបីជាប្អូនៗ ចាកចេញពីវាក៏ដោយ ក៏ផលប៉ះពាល់នៅតែបន្តតាមលងបន្លាចប្អូនៗដូចជា៖ ពិបាករកការងារធ្វើ ការបាត់បង់ទំនុកចិត្តនិងបញ្ហាសុខភាព ដែលបណ្តាលមកពីសម្ពាធនៃជីវិតតាមចិញ្ចើមផ្លូវទាំងនោះ។

ឯកឧត្តមអភិសន្តិបណ្ឌិត ក៏បានសង្កត់ធ្ងន់បន្តថា តើ “គ្រួសារ” ដែលប្អូនៗបានគិតនោះ អាចជួយប្អូនៗបានមែនទេ? ជាញឹកញយ វាក្លាយទៅជាការដាក់សម្ពាធ ភាពភ័យខ្លាច និងការដើរដល់ផ្លូវទ័លតែប៉ុណ្ណោះ។ មនុស្សជាច្រើន ដែលបានក្លាយជាក្មេងទំនើង រួចហើយ តែងតែនិយាយភាសាដូចៗគ្នាថា ពួកគេ សោកស្តាយនិងចង់ត្រឡប់ក្រោយវិញ។ អ្នកខ្លះ បាត់បង់មិត្តភក្តិ ដោយសារគ្រាប់កាំភ្លើង។ អ្នកខ្លះបាត់បង់អនាគតខ្លួនឯង ដោយសារធ្លាក់ចូលក្នុងបញ្ហាគ្រឿងញៀន ឬដេកក្នុងពន្ធនាគារជាដើម។
ប្អូនៗ មិនគួរធ្លាក់ខ្លួនចូលទៅក្នុងផ្លូវបែបនោះទាល់តែសោះ! ប្អូនៗ កើតមកដើម្បីធ្វើអ្វីៗដែលអស្ចារ្យនិងមានប្រយោជន៍ជាងនេះ។

ក្នុងសំណេរដដែល ឯកឧត្តមអភិសន្តិបណ្ឌិត ស សុខា បានចោទជាសំណួរ និងបរិយាយថា តើអ្វីជាអំណាចពិតប្រាកដ? ពេលភ្ញាក់ឡើងរៀងរាល់ព្រឹក ប្អូនៗត្រូវចងចាំថា អនាគតរបស់ប្អូនៗ ស្ថិតនៅក្នុងដៃប្អូនៗខ្លួនឯង មិនមែននៅក្នុងការបង្គាប់បញ្ជារបស់មេក្រុមក្មេងទំនើងណាម្នាក់នោះទេ។

សំណេរបន្ត ឯកឧត្តមអភិសន្តិបណ្ឌិត បានចោទជាសំណួរ និងបរិយាយបន្តថា តើអ្វីជាកិត្តិយសពិតប្រាកដ? វាកើតចេញពីការកសាងអ្វីដែលមានតម្លៃយូរអង្វែង ដូចជា៖ ការបានបញ្ចប់ការសិក្សា ការរៀនយកជំនាញ ការចាប់ផ្តើមអាជីវកម្ម ការបង្កើតស្នាដៃសិល្បៈ ការលេងកីឡា និងការជួយដល់សហគមន៍ជាដើម។

ជាមួយគ្នានេះ ឯកឧត្តមអភិសន្តិបណ្ឌិត ស សុខា ចោទជាសំណួរ និងបកស្រាយបន្តថា តើអ្វីជាគ្រួសារពិតប្រាកដ? គឺមនុស្សដែលលើកស្ទួយប្អូនៗ ឱ្យខ្ពស់ឡើង មានដូចជា៖ ឪពុកម្តាយ គ្រូបង្រៀន អ្នកណែនាំ និងមិត្តភក្តិដែលជំរុញប្អូនៗ ឱ្យឈានទៅរកភាពជោគជ័យ មិនមែនរស់នៅក្នុងស្ថានភាពឱ្យតែមានជីវិតរស់នោះទេ។
 
ក្នុងសំណេរបន្ត ឯកឧត្តមអភិសន្តិបណ្ឌិត បានបន្តទៀតថា ខ្ញុំបានឃើញរឿងរ៉ាវជាច្រើន! មានយុវជនល្អៗជាច្រើន ដែលបានបដិសេធចោលនូវការទទួលរងសម្ពាធទាំងនោះ ហើយពួកគេ បានកសាងជីវិតដ៏អស្ចារ្យ។ អតីតសមាជិកក្រុមក្មេងទំនើង ដែលបានប្តូរជីវិត បានរកឃើញគោលដៅជីវិតថ្មី បង្កើតអាជីវកម្ម ក្លាយជាសិល្បករ អ្នកណែនាំ ថែមទាំងបានក្លាយជាអ្នកជោគជ័យធំៗ ដែលជួយអ្នកដទៃ ឱ្យគេចផុតពីអន្ទាក់ដូចគ្នានោះទៀតផង។ ពួកគេ មិនរង់ចាំការអនុញ្ញាតពីអ្នកណានោះឡើយ ប៉ុន្តែពួកគេ ជ្រើសយកវិន័យ ការអប់រំ និងសកម្មភាពវិជ្ជមានដោយខ្លួនឯង។ ពួកគេបានជ្រើសរើសនៅជុំវិញខ្លួនដោយមនុស្សដែលមានគោលដៅក្នុងជីវិត មិនមែនមនុស្សដែលរស់ដោយគ្មានទិសដៅឡើយ។

ជាមួយគ្នានោះ ឯកឧត្តមអភិសន្តិបណ្ឌិត ស សុខា ប្អូនៗ ក៏អាចក្លាយជាមនុស្សល្អ ដូចពួកគេទាំងនោះបានដែរ! ឥឡូវនេះ ពិភពលោក ពោរពេញទៅដោយឱកាសសម្រាប់អ្នកដែលមានថាមពល និងសក្តានុពលដូចប្អូនៗ។ សូមចូលរួមជាមួយក្រុមកីឡាករ កីឡាការិនី កម្មវិធីក្រៅម៉ោងសិក្សា ការបណ្តុះបណ្តាលការងារ តន្ត្រី បច្ចេកវិទ្យា ជំនាញវិជ្ជាជីវៈ … ដែលធ្វើឱ្យប្អូនៗ មានកម្លាំងចិត្ត។ ត្រូវបដិសេធរាល់អន្ទាក់អូសទាញទាំងឡាយ

និងត្រូវកសាងបុគ្គលិកលក្ខណៈដ៏រឹងមាំសម្រាប់ខ្លួនឯង។

ជាបន្ត ឯកឧត្តមអភិសន្តិបណ្ឌិត បានផ្ញើសារជូនចំពោះយុវជនទាំងអស់! ជោគវាសនារបស់ប្អូនៗ មិនមែនស្ថិតលើការកំណត់របស់ក្រុមក្មេងទំនើងនោះទេ។ វាជារឿងជីវិតផ្ទាល់របស់ប្អូនៗ។ ដូច្នេះប្អូនៗ ត្រូវសរសេរវាសនាជីវិតដោយខ្លួនឯង ដោយភាពក្លាហាន។ ត្រូវដើរចេញពីសម្ពាធទាំងនោះ។ និយាយជាមួយនរណាម្នាក់ដែលប្អូនៗ ទុកចិត្តដូចជា៖ ឪពុកម្តាយ អ្នកជួយប្រឹក្សា ឬគ្រូបង្វឹកជាដើម។ ចូលរួមសកម្មភាពវិជ្ជមាន ចាប់ពីថ្ងៃនេះតទៅ។ សូមបង្កើតជំនាញ ចាប់យកតាមគោលដៅ និងការពារភាពសុខសាន្ត និងអនាគតរបស់ប្អូនៗ។

ជាមួយគ្នានោះ ឯកឧត្តមអភិសន្តិបណ្ឌិត ស សុខា បានលើកទឹកចិត្តថា ប្អូនៗ មិនមែននៅឯកោនោះទេ! ប្អូនៗ ជាមនុស្សមានតម្លៃ។ ផ្លូវមិនត្រូវបានបិទសម្រាប់ប្អូនៗនោះទេ ពោលគឺមានតែការសម្រេចចិត្តរបស់ប្អូនៗ នៅថ្ងៃនេះប៉ុណ្ណោះ ដែលអាចកំណត់អនាគតរបស់ប្អូនៗបាន។

ជាបន្ត ឯកឧត្តម បានបន្តទៀយថា ចូរប្អូនៗ ក្រោកឈរឡើង! ត្រូវជ្រើសយកសេរីភាព! ជ្រើសរើសយកភាពរីកចម្រើន! ជ្រើសយកមរតកដែលកូនៗជំនាន់ក្រោយរបស់ប្អូនៗ នឹងមានមោទនភាព មិនមែនមរតកដែលធ្វើឱ្យពួកគេ ខ្លាចនោះទេ។ សូមចាំថា ជីវិតក្នុងក្រុមក្មេងទំនើង បញ្ចប់ដោយភាពងងឹត។

សំណួរ និងការបរិយាយចុងបញ្ចប់ ឯកឧត្តមអភិសន្តិបណ្ឌិត ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានលើកឡើងថា តើជីវិតពិតរបស់ប្អូនៗ យ៉ាងណាវិញ? វាអាចភ្លឺបំផុតដល់ថ្នាក់បំភ្លឺសហគមន៍ទាំងមូលបានទៀតផង។ ប្អូនៗមានអំណាច។ ចូរប្រើវាដោយគតិបណ្ឌិត។ ពិភពលោក កំពុងរង់ចាំមើលរឿងដ៏អស្ចារ្យ ដែលប្អូនៗនឹងធ្វើ។
តស់! យើងមកសាងអនាគតជាមួយគ្នា តាមផ្លូវដ៏ត្រឹមត្រូវ!!


Tuesday, 7 April 2026

ឯកឧត្តមអភិសន្តិបណ្ឌិត ស សុខា អំពាវនាវអាណាព្យាបាល យកចិត្តទុកដាក់ជាអាទិភាពលើការអប់រំកូនចៅ ចាប់ពីថ្នាក់កុមារតូច!

ចំនួនអ្នកទស្សនា: Views


កឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានក្រុមការងាររាជរដ្ឋាភិបាល ចុះមូលដ្ឋានព្រៃវែង បានទទូចនិងអំពាវនាវដល់អាណាព្យាបាលគ្រប់រូប ដែលមានកូន ប្អូន ឬក្មួយ គ្រប់អាយុចូលរៀន ត្រូវបញ្ជូនទៅចុះឈ្មោះចូលរៀនកុំបីខាន ដើម្បីកសាងមូលដ្ឋានគ្រឹះចំណេះដឹង និងអនាគតដ៏ភ្លឺស្វាងសម្រាប់កុមារគ្រប់រូប ជាពិសេសដើម្បីប្រែក្លាយពួកគេ ឱ្យទៅជាធនធានមនុស្សដ៏មានសក្ដានុពល ចូលរួមចំណែកអភិវឌ្ឍសហគមន៍ ក៏ដូចជាសង្គមជាតិ ឱ្យកាន់តែរីកចម្រើនរុងរឿង និងប្រកបដោយសេចក្ដីថ្លៃថ្នូរ ស្របតាមយុទ្ធសាស្ត្របញ្ចកោណរបស់រាជរដ្ឋាភិបាល។


ការថ្លែងបែបនេះ ធ្វើឡើងក្នុងឱកាសដែលឯកឧត្តមអភិសន្តិបណ្ឌិត និងលោកជំទាវ កែ សួនសុភី ស សុខា អញ្ជើញជាអធិបតីដ៏ខ្ពង់ខ្ពស់ក្នុងពិធីសម្ពោធដាក់ឱ្យប្រើប្រាស់អគារមត្តេយ្យសិក្សា ចំនួន ១ខ្នង មាន៤បន្ទប់ និងពិសាអាហារសាមគ្គីជាមួយលោកគ្រូ អ្នកគ្រូ សិស្សានុសិស្ស និងអាណាព្យាបាលសិស្ស នៅសាលាមត្តេយ្យសិក្សាពោធិ៍អណ្តោត ស្ថិតក្នុងភូមិពោធិ៍អណ្តោត ឃុំជើងភ្នំ ស្រុកបាភ្នំ ខេត្តព្រៃវែង នាព្រឹកថ្ងៃទី៧ ខែមេសា ឆ្នាំ២០២៦ នេះ។

ឯកឧត្តមអភិសន្តិបណ្ឌិត ឧបនាយករដ្ឋមន្ត្រី បានគូសបញ្ជាក់ថា ការបញ្ជូនកូន ប្អូន ឬក្មួយ ដែលគ្រប់អាយុចូលរៀន គឺជាកាតព្វកិច្ចដ៏សំខាន់សម្រាប់អាណាព្យាបាលគ្រប់រូប ព្រោះកុមារប្រៀបដូចជាក្រដាសសមួយផ្ទាំង ដែលងាយនឹងទទួលយកនូវការអប់រំ និងការបណ្ដុះបណ្ដាល។ បើសិនជាយើងអាចផ្ដល់នូវចំណេះដឹង និងគុណធម៌ដល់ពួកគាត់ បានទាន់ពេលវេលា នោះពួកគាត់នឹងក្លាយជាពលរដ្ឋល្អ ជាសសរទ្រូងដ៏រឹងមាំ ដែលមានទាំងសមត្ថភាព និងសីលធម៌ ដើម្បីបន្តវេនក្នុងការដឹកនាំ និងការពារមាតុភូមិទៅថ្ងៃអនាគត។

ប្រមុខក្រសួងមហាផ្ទៃ បានបង្ហាញការកត់សម្គាល់ថា កុមារ ដែលបានចូលរៀនចាប់ពីថ្នាក់មត្តេយ្យសិក្សាឡើងទៅ គឺភាគច្រើនបានប្រឡងជាប់សញ្ញាបត្រមធ្យមសិក្សាទុតិយភូមិ (បាក់ឌុប) ព្រោះដោយសារពួកគាត់ មានមូលដ្ឋានគ្រឹះនៃការយល់ដឹងតាំងពីតូច ដែលធ្វើឱ្យការបន្តការសិក្សានៅថ្នាក់ខ្ពស់ៗមិនមានភាពរអាក់រអួល ហើយថែមទាំងជួយឱ្យកុមារមានភាពក្លាហាន និងមានវិន័យរឹងមាំក្នុងការសិក្សា ជាងកុមារដែលមិនបានឆ្លងកាត់ថ្នាក់មត្តេយ្យសិក្សា។

ក្នុងន័យនេះ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី មានប្រសាសន៍បន្តថា ការសម្ពោធដាក់ឱ្យប្រើប្រាស់អគារមត្តេយ្យសិក្សានាព្រឹកនេះ ពិតជាមានសារៈសំខាន់ណាស់ ក្នុងការចូលរួមចំណែកលើកកម្ពស់គុណភាពវិស័យអប់រំនៅមូលដ្ឋាន ឱ្យកាន់តែប្រសើរឡើង និងឆ្លើយតបទៅនឹងតម្រូវការជាក់ស្ដែងរបស់ប្រជាពលរដ្ឋ ក្នុងការបញ្ជូនបុត្រធីតា ឱ្យមកទទួលយកការបណ្ដុះបណ្ដាលក្នុងបរិស្ថានសិក្សាដែលសមរម្យ មានសុវត្ថិភាព និងមានស្តង់ដារត្រឹមត្រូវ។

ឯកឧត្តមអភិសន្តិបណ្ឌិត បានបន្តថា អគារសិក្សាថ្មីនេះ មិនមែនត្រឹមតែជាសំណង់បេតុងប៉ុណ្ណោះទេ ប៉ុន្តែវាគឺជាថ្នាលបណ្ដុះពូជចំណេះដឹងយ៉ាងសំខាន់ ដែលនឹងជួយសម្រាលបន្ទុកអាណាព្យាបាល និងផ្ដល់ឱកាសស្មើៗគ្នាដល់កុមារក្នុងសហគមន៍ឱ្យមានលទ្ធភាពចូលរៀនបានទាន់ពេលវេលា ស្របតាមទិសដៅរបស់រាជរដ្ឋាភិបាល ក្នុងការកសាងមូលធនមនុស្សតាំងពីកម្រិតដំបូងបង្អស់។

ប្រមុខក្រសួងមហាផ្ទៃ ក៏បានថ្លែងអំណរគុណដល់សប្បុរសជននានា ក៏ដូចជារដ្ឋបាលខេត្តព្រៃវែង រដ្ឋបាលស្រុកបាភ្នំ មន្ទីរអប់រំ យុវជន និងកីឡាខេត្ត ការិយាល័យអប់រំស្រុក លោកគ្រូ អ្នកគ្រូ និងអាជ្ញាធរគ្រប់លំដាប់ថ្នាក់ ដែលបានរួមសហការគ្នាយ៉ាងសកម្មក្នុងការជំរុញការអភិវឌ្ឍវិស័យអប់រំនៅក្នុងមូលដ្ឋាន ឱ្យមានការរីកចម្រើនជាបន្តបន្ទាប់ ដែលបញ្ជាក់ឱ្យឃើញពីស្មារតីរួមគ្នា កសាងអនាគតកុមារកម្ពុជា ឱ្យកាន់តែមានពន្លឺ និងរុងរឿងជានិរន្តរ៍៕